ئافرەت لەشارستانیەتی ئیسلامدا

پێش هاتنی ئیسلام لەنێو عەرەبدا ئافرەت شان وشکۆی نەبووە و،  لەلایەن پیاوەوە  وەک کاڵایە سەیردەکرا ، دەیان وت هەموو ئەرک و مافی ئافرەت ئەوەیە کە دەبێت منداڵ بنێتەوە و شیری منداڵ بدات، دوای تەواکردنی ماوەی پێدانی شیری منداڵیش هیچ پشکێکی لەپەروەردەی منداڵدا نەبووە، و پیاوان لەهاوسەرگیریدا سنوریان بۆنەبووە ، چەند ئافرەتیان بویستایە دەیانتوانی بیهێنن ، ئەمە سەرەڕای ئەوەی زۆربەی هۆزەکان کچەکانیان زیندە بەچاڵدەکرد.بەڵام کاتێک ئیسلام هات هەموو نایەکسانیەکانی ڕەتکردەوە شوناسی بەخشی بەئافرەت ، خودای گەورە  لە بنەما و ئەسڵی دروستکردندا پیاو و ئافرەتی یەکسان دروست کردوە , جیاوازی نەکردوە لە نێوانیاندا (خَلَقَكُم مِّن نَّفۡسٖ وَٰحِدَةٖ ثُمَّ جَعَلَ مِنۡهَا زَوۡجَهَا) الزمر/٦ واتە ((خوا ئێوەی لەگیانی ئادەم دروستکردوە هەر لەئادەمیش خێزانەکەی واتە حەوای دروستکردوە))، خوای گەورە ئافرەت و پیاوی لە ئەسڵی بەندایەتی کردن و ئەرکە شەرعیەکانیشدا یەکسانی کردون , فەزڵ و گەورەی هیچ یەکێکیانی نەداوە بەسەر ئەوی تریاندا تەنها پێوەرێک کە دایناوە بۆ جیاوازیکردن لە نێوانیانیاندا بە جۆرێک کە کامیان لەکامیان لەپێشتر و بەڕێزتر بێت بریتیە لەپێوەری لەخواترسان و چاکەکاری و چاکسازی وەک دەفەرموێت ((يَٰٓأَيُّهَا ٱلنَّاسُ إِنَّا خَلَقۡنَٰكُم مِّن ذَكَرٖ وَأُنثَىٰ وَجَعَلۡنَٰكُمۡ شُعُوبٗا وَقَبَآئِلَ لِتَعَارَفُوٓاْۚ إِنَّ أَكۡرَمَكُمۡ عِندَ ٱللَّهِ أَتۡقَىٰكُمۡۚ إِنَّ ٱللَّهَ عَلِيمٌ خَبِير))ٞ (الحجرات :13) واتە ((ئەی خەڵکینە ئێمە ئێوەمان لەنێر و مێیەک دروست کردووە و کردوومانن بەچەند هۆزو عەشیرەت و قەومێکەوە تابەبرایەتی و خۆشەویستیەوە لەگەڵ یەکتریدا مامەڵە بکەن , بێگومان باشترین کەستان لای خودا ئەو کەسەتانە کە لەهەموتان پارێزگارتر و لەخوا ترستر بێت, بەراستی خوا بەکاروکردەوەکانتان زۆر ئاگادارە)). بەڵام لەڕۆژگاری ئەمڕۆماندا دەبین زۆرکەس و لایەن وڕێکخراو هەن گەر ئافرەتان و تاکەکانمان شارەزانەبن  ئەوا توشی هەڵدێریان دەکەن بەبیانووی ئەوەی ئیسلامی غەدری لەئافرەت کردووە فەزڵی پیاوی داوە بەسەر ئافرەتدا.